كيف تستثمر اموالك وتشتري اسهم مضمونة وتربح منها

كيف تستثمر اموالك وتشتري اسهم مضمونة ؟!

اولا مافيش شركة وهمية مضمونة ..

ولاني اشوف عدد المدافعين عن الوهم يكثر .. قررت اتكلم و من واقع تجربة مع شركة من عينات هذه الشركات الوهمية شركة " #دوبلي " .. قبل فترة صديقة عزيزة كلمتني انها تشتي تشترك بهذه الشركة حاولت احذرها منها وانه المبلغ يعتبر كبير على انك ترميه بموقع مايضمن لك حقك فيه اي ضمان ..
مافيش فايدة اصرت انها تجرب فودفت معاهم ودفعت لهم 600 دولار مقابل اشتراك بحساب عضوية "وكالة" كانت قد اقنعتها واحدة من الوكلاء السابقات وغسلت دماغها انه مشروع جبار وانها بتكسب ذهب .. المهم جلسوا يركنوها انه نقاطها ترتفع وارباحها تزيد وعملوا لهم دورات تدريبية يعلموهم كيف يجروا بعدهم ضحايا جدد وما الى ذلك ..

لحد كم شهر بعد استلامهم المبلغ منها ابلغوها عبر الموقع انه اتوقفت عضويتها وانه لازم تجدد الاشتراك بكم مية دولار كمان وتدفعها لهم وترفع نقاطها وتترقى لدرجة منصوب عليه اول .. والا خلاص تعتبر مالها اي امتيازات عندهم ..

و #نسيت اقولكم انه الارباح هذه مش منهم انما هي عبارة عن كاش باك لعمليات الشراء اللي كانت تقوم بها صديقتي هي واهلها عبر موقع دوبلي من مواقع اخرى يعني شلوا عليها ال600 $ وفوقها ارباحهم من المواقع اللي هم متعاقدين معاهم واللي هي كانت تشتري منها اونلاين .. طبعا صديقتي مش باليمن ولمن اشتركت معاهم برضة كانت برع اليمن عشان لو احد اتعذر بحكاية عدم امكانية سحب المبالغ من اليمن .

بدأت صديقتي تحس انها اتنصب عليها و سلمتني حسابها عشان ادخل اساعدها بانه على الاقل تسترد مبلغ الارباح اللي يطلع في عداد حسابها انه ربح سنة واللي هو 205 دولار بسسس .. حاولت اجدد لها العضوية بهذه الميتين دولار اللي بحسابها ونشوف اخرتهم فين مافيش فايدة ما قبلوش التجديد ..

طيب حاولت اسحبها لها عبر البايبال برضه مافيش فايدة اتواصلت مع الدعم الفني ووصلوني بإدارة الحسابات تبعهم وجلسوا اكثر من اربعة اشهر يردوا عليا انه احنا شغالين على الموضوع لا تقلقوش اكيد بتنحل المشكلة وتقدروا تسحبوها .. قليلا من الصبر ..

وعليها لحد اليوم فاتت اكثر من سنة على طلب استرداد الارباح و ال200 دولار اللي ارباح ال 600 دولار وعمليات الشراء اللي قامت بها صديقتي عن طريقهم مجرد رقم مكتوب بحساب الضحية و لمدة سنتين .. يعني لا ال600 دولار حقها رجعت لها ولا الارباح الوهمية منها رجعت لها ..
*مرفق صورة من داخل الحساب الخاص بصديقتي 👇 ..

وبعد هذا اعتقد مافيش حد من اللي فاهمين بالعمليات هذه كيف تتم وفاهم ايش يعني شركات استثمار، انه ما اجتهد ووضح كيف يتم النصب على اصحاب فكرة "اشتي مشروع يجيب لي ارباح بدون تعب" واللي يشتوا يستثمروا اموالهم مع #شركات_وهمية لا اصل لها ولا فصل سواء الدولية او المحلية .. لا مقرات ولا اصول ولا اعضاء مجلس ادارة ولا مدراء معروفين و لا حسابات بنكية معروفة يعني يوم ما يتنصب عليك مابتلاقيش غريم لك تقاضيه ..

اما بالنسبة للشركات الوهمية المحلية فهذه لازم تعرفوا انه اللي اشتركوا فيها ويدافعوا عن الشركة هم المشتركين السابقين يعني بالبلدي كذه هم الطعم اللي يصطادوا فيه البقية ويجلسوا هم واللي بعدهم الطعم لغاية ماتجي الفرصة المناسبة لهذه الشركات وبيوم وليلة ترجع فص ملح وذاب بعدما تضرب ضربتها القاضية وتكون اما حققت الهدف المنشود من الهبرات الكبيرة او بدأت ريحتها تفوح وبدأت الاجهزة الامنية بملاحقتها ..

ومش بالضرورة يكونوا المدافعين هم من اللي قد شبعوا ارباح قد يكونوا من المودفين اللي حسوا انهم وقعوا بالفخ وعشان يتخارجوا منه يقوموا يودفوا باللي بعدهم عشان على الاقل يقدروا يستردوا راس مالهم ..
اما المشتركين السابقين الفطاحل اللي يقولوا انهم استلموا ورجعوا رؤوس اموالهم وفوقها ارباحهم لحد الان ..
ايوة صح رجعوها وربحوا مابنكذبهمش .. بس اللي مصممين انهم يجادلوا فيه انهم يحاولوا يقنعوا الناس انه الدنيا امان وناسيين انه الشركات الوهمية اللي زي هذه ماكانتش بتنجح لو ما عملت لها كم سنة صيت وسمعه وشنه ورنه وسلمت ارباح للناس اللي تعتبرهم طعم لمئات الالاف من الناس اللي بعدهم ..
بس مش راضيين يقتنعوا ان الارباح هذه يأكلوها بالحرام من ظهر الغلابه اللي بعدهم .. ومن ظهر الناس اللي بيكونوا هم الضحية الأكبر بالاخر ..

بعد كل التوضيحات اللي نشرت في كل الصفحات وبعد كل التحذيرات هذه، اللي بيرضى يكون ضحية لهذه الشركات ساعتها نقدر نقول له تستاهل ومبروك عليك تشرب النكبة هذه بس انتبه تشربها لابوك والا امك والا اخوانك اللي انت عارف انه المبلغ اللي بتقنعهم يشاركوا فيه بيقسم ظهورهم ويبيعهم اللي فوقهم واللي تحتهم وهم مالهم علم بالتحذيرات هذه وتكون اكلت حرام وحرمت اقرب الناس لك من اموالهم بإقناعك لهم انه كلما زاد شرائهم للاسهم كلما زادت ارباحهم ..

ولو يا هذا قتلك الفضول وحبيت تشارك بالاسهم الوهمية هذه شارك بس اتقي الله بالناس اللي يجهلوا النتائج المترتبة على عملية تسويقك لشركة انت نفسك كل اللي يربطك فيها حتة مندوب لاطلع ولانزل وبأي لحظة بيغير عنوانه ومقر اقامته واتحديك ساعتها تلاقيه والا تخرج منه بفلس واحد .. او ببساطة بيقولك انا كمان اتنصب عليا وحالي من حالك وانت معاك عقل وبصر وانت اللي اجيت لي برجولك ..

اتقوا الله بالناس اللي يلا باقي لهم كم خاتم والا اسواره مخلينها نجدة ليوم اسود فلا تسودوا لهم عيشتهم معاكم ..

اللهم إني بلغت اللهم فأشهد ..
Hana Alabsi
#HenoTechno